បងប្អូនយើងប្រហែលបានដឹងរួចមកហើយថា តាមជំនឿរបស់ប្រជាជនចិន និងបងប្អូនដែលមានជាប់សែស្រឡាយចិន គេចាត់ថាវេលានេះជាខែខ្មោច ដែលជាពេលឋាននរកបើកទ្វារអោយវិញ្ញាណក្ខន្ធអ្នកដែលបានចែកឋានទៅដល់ឋានក្រោមហើយមិនទាន់បានទទួលការចាប់កំណើតឬឡើងទៅស្ថានសួគ៌ បានឡើងមកទទួលយកសំណែន ឬបុណ្យពីសាច់ញាតិដែលនៅរស់។ នៅក្នុងឆ្នាំ២០២៤នេះ រយៈពេលដែលគេចាប់ផ្តើមគឺចាប់ផ្តើមពីថ្ងៃ០៤ ខែសីហា រហូតដល់ ២ ខែកញ្ញា ហើយថ្ងៃដែលគេប្រារព្ធពិធីសែនព្រេនធំជាងគេ គឺនៅថ្ងៃទី១៨ ខែសីហា ឆ្នាំ២០២៤ ដែលយើងនិយមហៅថាជាថ្ងៃ សែនក្បាលទឹក ហើយវាក៏ជាវេលាដែលទ្វារនរកបើកធំជាងគេផងដែរ។ គួរកត់សម្គាល់់ផងដែរថា នៅថ្ងៃទី១៨ ខែសីហា នេះ ត្រូវជាថ្ងៃខាល ខែវក ដែលជាថ្ងៃឆុងធំប្រចាំខែសីហា ដូច្នេះរាល់កិច្ចការទាំងឡាយនៅថ្ងៃទី១៨នេះ ត្រូវតែប្រុងប្រយ័ត្នអោយបានខ្ពស់។ ម៉ោងល្អសម្រាប់សែនក្នុងថ្ងៃនោះគឺ៖* ម៉ោងរោង(ចន្លោះម៉ោង៧៖០០ ដល់ ៨៖៥៩ព្រឹក) និងមមែ(ចន្លោះម៉ោង ១៣៖០០ ដល់ ១៤៖៥៩) ល្អជាងគេ* ម៉ោងម្សាញ់(ចន្លោះម៉ោង៩៖០០ ដល់ ១០៖៥៩ព្រឹក) មធ្យម* ម៉ោងថោះ(ចន្លោះម៉ោង៥៖០០ ដល់ ៦៖៥៩ព្រឹក) មមី(ចន្លោះម៉ោង១១៖០០ ដល់ ១២៖៥៩ថ្ងៃត្រង់) និងវក(ចន្លោះម៉ោង១៥៖០០ ដល់ ១៦៖៥៩ព្រឹក) ដាច់ខាតមិនត្រូវធ្វើទេ។ * ហើយអ្នកដែលមានតួវក និងខាល មិនគួរចូលរួមអុជធូបទេ។ ជាមតិយោបល់ ខ្ញុំសូមណែនាំអោយធ្វើនៅថ្ងៃទី១៦ ខែសីហា ដែលជាថ្ងៃជូត ខែវក ព្រោះវាមានឋាមពលពិសេសពាក់ព័ន្ធនឹងកន្លែងបញ្ចុះសព។ សែនវេលាណាក៏បាន លើកលែងវេលាមិនល្អដែលគួរជៀសវាងដូចខាងក្រោម៖* ម៉ោងមមី(ចន្លោះម៉ោង១១៖០០ ដល់ ១២៖៥៩ថ្ងៃត្រង់) *​ ម៉ោងច(ចន្លោះម៉ោង១៩៖០០ ដល់ ២០៖៥៩យប់)* ហើយអ្នកដែលមានតួមមី និងខាល មិនគួរចូលរួមអុជធូបទេ។ ចូលអានអត្ថបទចាស់ ពាក់ព័ន្ធនឹងតំណមដែលគួរយកចិត្តទុកដាក់នៅវេលានេះ៖https://web.reanfengshui.com/knowledge-base/ghost-month-2021 តាមការយល់ដឹងនិងសិក្សាកន្លងមក យើងគួររក្សាតំណមដូចអត្ថបទខាងលើ ក្នុងកំឡុងពេលចូលវស្សារហូតដល់ចេញវស្សា ព្រោះវេលានេះមានឋាមពលយិនច្រើន ដែលភាសាទូទៅថា មានវិញ្ញាណចេញមកច្រើន ហើយអង្គដែលថែរក្សាយើងកន្លងមកក៏លោកចូលទីអាស្រមចម្រើនធម៌ក្នុងកាលវស្សាដែរ។ បងប្អូនក៏គួររក្សាបុណ្យដាក់ទាន និងឧទ្ទិសចែកកុសលផលបុណ្យដល់ លោកអ្នកដែលមានគុណនិងសាច់ញាតិទាំងឡាយដែលបានចែកឋាន បារមីសម្តេចព្រះគ្រូ គ្រូឧបជ្ឈាយ អ្នកជំនាងផ្ទះ ព្រះភូមិ ទេវតានានាគោរពនៅផ្ទះដែលថែរក្សាផ្ទះ… និងខ្មោចអនាថាតាមដងផ្លូវនៅមុខផ្ទះ កន្លែងរកស៊ី ឬនៅតាមកន្លែងដែលអ្នកទៅដល់ផង ដើម្បីចម្រើនមេត្តាធម៌ និងទទួលបានពរជ័យពីពួកគាត់។ សម្រាប់បងប្អូនដែលជាសមាជិកក្លឹបចក្រវាឡ ក៏បានទទួលនូវវិធីការពារខ្លួនពិសេសបន្ថែម។ មានមតិនៅលើបណ្តាញសង្គមខ្លះបានលើកឡើងថា ទ្វារនរកបើករាល់ថ្ងៃតើ ព្រោះមនុស្សស្លាប់រាល់ថ្ងៃ។ មតិនោះមិនខុសទេ តែអ្នកបញ្ចេញមតិគួរអាន និងយល់អោយច្បាស់នូវឃ្លាថា គេបើកទ្វារអោយវិញ្ញាណក្ខន្ធអ្នកដែលបានចែកឋានទៅដល់ឋានក្រោម…បានឡើងមកមកទទួល។ ដូច្នេះមានន័យថា ជាវេលាដែលគេអោយវិញ្ញាណចេញក្រៅ។ រីឯមតិខ្លះក៏បានឌឺដងទៅលើអ្នកសរសេរអត្ថបទនានាពាក់ព័ន្ធនឹងខែខ្មោចនេះថា ធ្លាប់ទៅដល់ឋាននរកមែនបានដឹងថាគេបើកទ្វារ?! ការពិតទៅ បើមនុស្សរៀនទទួលបានចំណេះដឹង គេមិនសួរសំនួរបែបនោះទេ ព្រោះនេះជាជំនឿតាមប្រពៃណី ហើយក៏មានវិជ្ជាសម្រាប់គណនាកម្លាំងឋាមពលដែរ។ ជូនពរសំណាងល្អ!

ដើមហ្វី(Fir Trees) ជាប្រភេទដើមឈើមួយក្នុងចំណោមប្រភេទដើមឈើរាប់សិបប្រភេទក្នុងអំបូរដើមស្រល់ ហើយវាជាប្រភេទរុក្ខជាតិដែលមានពណ៌បៃតងស្រស់គ្រប់រដូវកាល(Evergreen Plants)។ យើងតែងតែឃើញនៅប្រទេសត្រជាក់ គេយកវាមកតាំងជាដើមឈើណូអែល(ការដាក់តាំងគឺអាស្រ័យទៅតាមតំបន់ ព្រោះតំបន់ខ្លះសម្បូរដើមស្រល់ រីឯតំបន់ខ្លះទៀតសម្បូរដើមផ្សេងក្នុងអំបូរវា)។ ប្រជាជនចិនតាមតំបន់ខ្លះ គេអោយឈ្មោះវាថាជា ដើមឡហាន ហើយគេមានជំនឿថា វាជារុក្ខជាតិដែលនាំលាភសំណាង ភាពជោគជ័យ សុខភាពល្អ និងការពារហេតុភេទចង្រៃនានា។ ដោយសារតែវាមានសម្រស់បៃតងស្រស់ពេញគ្រប់រដូវ ទើបគេធៀបនឹងរាសីរបស់មនុស្សយើងថាមានរាសីល្អគ្រប់រដូវដែរ។ វាមានឥទ្ធិពលប្រហាក់ប្រហែលនឹងដើមលុយដែរ។ ដើមឡហាននេះ ត្រូវបានគេយកមកពត់ពេនជារាងផ្សេងៗក្នុងន័យលម្អរ និងដើម្បីលក់បានថ្លៃជាងដើមដែលដុះត្រង់តាមធម្មជាតិ។ តែមិនគួរយកដើមដែលគេកាត់អោយតឿនោះឡើយ(Bonsai) ព្រោះវាទាបតឿមិននាំអោយរាសីយើងឡើងឡើយ។ ក្នុងន័យហុងស៊ុយ សម្រាប់អ្នកដែលត្រូវការធាតុឈើឬធាតុភ្លើង គប្បីដាំវាដើម្បីជំនួយរាសី រីឯអ្នកដែលសម្បូរធាតុទឹកលើសលុប ក៏គួរដាំវាដែរដើម្បីអោយវាបន្ថយធាតុទឹកកុំអោយជន់ជោរពេក។ ការរើសទីតាំងដាំក៏គួរតែសិក្សាអោយបានត្រឹមត្រូវផងដែរ។ អ្នកលក់អើយ បើបានអានហើយ សូមកុំឡើងថ្លៃអី ព្រោះទុកឳកាសអោយបងប្អូនយើងបានរុក្ខជាតិនេះទៅដាំលម្អរនៅផ្ទះផង! រួមគ្នាប្រឆាំងការលួចចម្លងសំណេរដើម! រក្សាសិទ្ធិគ្រប់យ៉ាងដោយ រៀនហុងស៊ុយ ជាមួយគ្នា #រៀនហុងស៊ុយ#reanfengshui#realfengshui#fengshuikhmer

ថ្ងៃនេះ ខ្ញុំបានទទួលសំនួរជាច្រើនពាក់ព័ន្ធនឹងការរៀបចំពិធីសែនចូលឆ្នាំចិន។ មន្ទិលទាំងឡាយកើតមានឡើងដោយសារមានទស្សនៈផ្ទុយគ្នាជាច្រើននៅលើបណ្តាញសង្គមដែលមិនដឹងគួរជឿតាមមួយណា។​ កុំឃើញដំរីជុះ នាំគ្នាជុះតាមដំរី!ជាយោបល់របស់ខ្ញុំ បងប្អូនគួររៀបចំពិធីសែនតាមទម្លាប់ និងលទ្ធភាពដែលអាចធ្វើទៅបាន។ ការសែនព្រេនមិនមែនជាហុងស៊ុយទេ តែវាជាទំនៀមទម្លាប់តាមប្រពៃណីយ៍និងតាមតំបន់របស់រៀងៗខ្លួន។ ដោយសារការសែនចូលឆ្នាំចិនជាប្រពៃណីយ៍របស់ចិន​ ហើយហុងស៊ុយមានប្រវត្តិមកពីចិន ទើបគេនាំគ្នាគិតថា ហុងស៊ុយ​ គឺជាការសែនព្រេន។  អ្នកជឿហុងស៊ុយមិនមែនត្រូវតែសែននោះទេ!ចូរបងប្អូនក្រឡេកមើលនៅប្រជាជននៅលោកប៉ែកខាងលិចដែលមាននៅទ្វីបអឺរ៉ុប និងអាមេរិកជាដើម គេកាន់សាសនាផ្សេងៗមិនដែលសែនព្រេនទេ តែក៏មានអ្នកជឿនិងប្រណិបត្តិតាមក្បួនហុងស៊ុយច្រើនដែរ។ បរិមាណអ្នកជឿហុងស៊ុយឥឡូវកាន់តែច្រើនជាងមុន។ សួរថា៖ ទាល់តែសែនទើបរកស៊ីមានបានឬ? ចម្លើយគឺ៖ អត់ទេ!សម្រាប់បងប្អូនដែលបារម្ភរឿងតារាសាស្ត្រ!បើបងប្អូនចេះដល់តារាសាស្ត្រ និងបារម្ភដល់ការឆុងពីការរៀបចំសែនដែលអាចឆុងនឹងតារាសាស្ត្រ បងប្អូនអាចមើលមេរៀនតារាសាស្ត្រស្វែងយល់អំពីធាតុរបស់វា(ចុចទីនេះដើម្បីមើលមេរៀនតារាសាស្ត្រ២០២២) និងអ្វីដែលបងប្អូនគួរដាក់នៅប្លុកទិសដែលរៀបចំសែននោះ។ តែជាយោបល់ កុំបារម្ភហួសដល់នោះអី សែនអស់តែប៉ុន្មានធូបតើ មិនមានការស្វានដុំជីកគាស់ឯណា។ កុំគិតស្មុគស្មាញដល់នោះពេក ខ្ញុំសុំសួរវិញថា៖ បើអង្គុយនៅទិសខាងត្បូងដែលជាទិសធាតុភ្លើង និងមានតារាធាតុភ្លើងចូល​ទៀត អញ្ចឹងយើងអត់ហ៊ានអង្គុយផឹកទឹកនៅទិសនោះឬ? កុំអន្ទង់វែងឆ្នាំងវែងអី! ទោះយ៉ាងណា ខ្ញុំសូមរាយនាមម្ហូបនិងផ្លែឈើមួយចំនួនដែលគេមិនសូវដែលចោលដូចខាងក្រោម៖១. មីវែងឆា តំណាងអោយភាពអមតៈយូរអង្វែង២. ត្រី តំណាងអោយភាពធូរធាររកស៊ីមានបាន៣. ក្រូចលឿងឬខ្វិច តំណាងអោយភាពស្រស់ស្រាយនាំលាភជ័យ សិរីមង្គល ការបកស្រាយអាចនឹងខុសពីខ្ញុំពន្យល់ ព្រោះវាអាស្រ័យទៅតាមជំនឿក្នុងតំបន់រៀងៗខ្លួន។ អ្វីដែលសំខាន់នោះគឺ ការជួបជុំក្រុមគ្រួសារនាំភាពស្រស់ស្រាយ សិរីសួស្តី និងសុភមង្គល សម្រាប់ឆ្នាំថ្មី!រីករាយឆ្នាំថ្មី! រួមគ្នាប្រឆាំងការចម្លងសំណេរដើមរក្សាសិទ្ធិគ្រប់យ៉ាងដោយ រៀនហុងស៊ុយ #រៀនហុងស៊ុយ#ហុងស៊ុយខ្មែរ#reanfengshui#fengshuikhmer#jwz

ពិធីបុណ្យសែននំព្រះខែ ជាពិធីបុណ្យមួយដែលប្រជាជនចិន និងអ្នកដែលជាប់សាច់ឈាមចិនតែងប្រារព្ធឡើងជារៀងរាល់ឆ្នាំ នៅថ្ងៃទី១៥ឬ១៦ ខែ៨ ក្នុងប្រតិទិនច័ន្ទគតិរបស់ចិន។ មានការតំណាលតគ្នាជារឿងនិទានជាច្រើនដែលនិយាយអំពីប្រវត្តិរបស់ពិធីបុណ្យសែននំព្រះខែនេះ។ ឥឡូវនេះ ខ្ញុំសូមលើកយករឿងនិទានមួយដែលគេចាត់ទុកថាជាប្រវត្តិរបស់ពិធីបុណ្យសែននំព្រះខែមកចែកជូនជាចំណេះដឹង៖ កាលពី ២១៧០ឆ្នាំមុនគ្រឹស្តសករាជ ដែនចក្រវាឡមានព្រះអាទិត្យចំនួន១០ ដែលបានចែកវេនគ្នាមកបំភ្លឺផែនដី។ វេលាមួយ ព្រះអាទិត្យទាំង១០នោះបានមកព្រមគ្នាដែលបង្ករអោយកើតមានជាគ្រោះក្តៅរាំងស្ងួតលើផែនដី ដែលធ្វើអោយប្រជាជនទាំងអស់នៅលើផែនដីពិបាកទ្រាំរស់។ បន្ទាប់មក មានអ្នកបាញ់ព្រួញម្នាក់ឈ្មោះ ហូអ៊ី បានចេញមុខមកបាញ់ទម្លាក់ព្រះអាទិត្យចំនួន៩អោយធ្លាក់ចុះ។ គាត់បានក្លាយជាវិរៈបុរសសង្គ្រោះផែនដី ហើយក៏ទទួលបានគុជវេទមន្តពីទេវតា (ឯកសារខ្លះនិយាយថាគាត់បានលួចពីទេវតា)។ ដោយសារគុជវេទមន្តនោះប្រើបានសម្រាប់តែម្នាក់ គាត់ក៏អោយប្រពន្ធដែលមានឈ្មោះថា ឆាងអឺ ថែរក្សា។ ថ្ងៃមួយមានចោរបានមកលួចប្លន់គុជវេទមន្តនោះពីឆាងអឺ នាងបានគិតថា បើវាធ្លាក់ក្នុងដៃជនមិនល្អ វានឹងកើតមានកលិយុគលើផែនដីទៀតហើយ។ ដូច្នេះគាត់ក៏សម្រេចចិត្តលេបគុជវេទមន្តនោះ ហើយក៏ក្លាយជាមនុស្សទេពដែលហោះចេញទៅក្លាយជាព្រះច័ន្ទ(ឯកសារខ្លះនិយាយថាគាត់ទៅរស់នៅឋានព្រះច័ន្ទ)។ គាត់មានចិញ្ចឹមទន្សាយមួយហើយទន្យាយនោះក៏ទៅជាមួយគាត់ដែរ។ ហូអ៊ី ខំរត់តាមប្រពន្ធគាត់ តែតាមមិនទាន់ បានត្រឹមបន្សល់នូវភាពសោកសៅ។ ចាប់ពីពេលនោះមក ដល់វេលាថ្ងៃទី១៥ឬ១៦ ខែ៨ ជារៀងរាល់ឆ្នាំ ហូអ៊ី និងប្រជាជនទាំងអស់តែងធ្វើនំព្រះខែសែនថ្វាយនាងឆាងអឺដែលជាព្រះច័ន្ទនោះ ដើម្បីតបស្នងសងគុណតរៀងមក។ មកដល់ពេលបច្ចុប្បន្ន ប្រជាជនដែលមានជាប់ខ្សែស្រឡាយចិនតែងតែប្រារព្ធពិធីសែននំព្រះខែដល់ព្រះនាងឆាងអឺ ហើយក៏រៀបចំជួបជុំក្រុមគ្រួសារដើម្បីកុំអោយព្រាត់ប្រាស់គ្នាដូច ឆាងអឺ និងហូអ៊ី។ អ្នកខ្លះបានថែមទាំងរៀបចំគ្រឿងរណ្តាប់សែន ដើម្បីសុំសេចក្តីសុខ និងបួងសួងផ្សេងៗ (រួមថែមទាំងសុំអោយដល់គូទៀតផង 😀

តើអ្នកធ្លាប់លឺគេថាអោយយកក្មេងទៅជាមួយបើអ្នកទៅរកទិញផ្ទះឬដីអីទេ? វាគឺជាជំនឿមួយក្នុងគម្ពីសាសនាតៅ(TAOISM) ដែលបានបញ្ជាក់ថា កុមារមានញាណពិសេសមួយដែលអាចដឹង និងឃើញនូវវិញ្ញាណឬឋាមពលដែលមនុស្សធំមិនដឹងនិងមិនឃើញ ជាពិសេសកុមារា។ ដំណើររឿងនិយាយអំពីក្បួននេះគឺវាវែងឆ្ងាយណាស់ តែបើបងប្អូនកំពុងឬនឹងចេញទៅរកមើលទិញផ្ទះឬដី ខ្ញុំសូមសង្ខេបនូវការប្រើប្រាស់ដូចខាងក្រោម៖ ១. យកកុមារា(ប្រុស)ម្នាក់ដែលមានវ័យក្រោម៧ឆ្នាំទៅជាមួយ ឬកាន់តែប្រសើរបើចេះមើលប៉ាជឺ គួររកកុមារាណាដែលមានតួរាសីថ្ងៃ យ៉ាង (Yang Day Master)(មិនគិតធាតុ) ឧទាហរណ៍៖ ទឹកយ៉ាង ដីយ៉ាង..។២. ចំណាយពេលប្រហែល២០នាទីនៅទីកន្លែងនោះ ហើយសង្កេត៖២.១ បើកុមារានោះលេង ឬធ្វើអ្វីផ្សេងៗដោយចិត្តសប្បាយរីករាយ មានន័យថា កន្លែងនោះមិនមានឋាមពលអាក្រក់ទេ២.២ បើកុមារានោះយំ ឬឈើបត់ជើង ឬស្រេកទឹក មានន័យថា កន្លែងនោះមានឋាមពលអាក្រក់អ្វីមួយហើយ មិនគប្បីទិញយកកន្លែងនោះទេ។ កុមារាដែលមានធាតុយ៉ាងបរិសុទ្ធងាយនឹងទទួលអារម្មណ៍ពាក់ព័ន្ធឋាមពលអាក្រក់ណាស់ ហើយវាក៏ជាមូលហេតុមួយក្នុងចំណោមមូលហេតុជាច្រើនដែលប្រជាជនចិនចង់បានកូនប្រុស។ ទោះយ៉ាងណា គ្រប់យ៉ាងគឺអាស្រ័យទៅលើជំនឿរបស់បងប្អូនផងដែរ! សូមជូនពរអោយបងប្អូនទាំងអស់មានសុខភាពល្អ និងជោគជ័យគ្រប់ភារកិច្ច!********រួមគ្នាប្រឆាំងការចម្លងសំណេរដើមរក្សាសិទ្ធដោយ រៀនហុងស៊ុយ ជាមួយគ្នា#រៀនហុងស៊ុយ#រៀនហុងស៊ុយជាមួយគ្នា#fengshuikhmer#reanfengshui#fengshuikh#ហុងស៊ុយខ្មែរ

កាលពីប៉ុន្មានថ្ងៃមុន ខ្ញុំបានចេញអត្ថបទខ្លីមួយដែលមានខ្លឹមសារថា៖មិនហ៊ានដាំប្រទាលបន្លាតូចៗ ព្រោះខ្លាចខុសហុងស៊ុយ តែបែរជាទៅទិញដើមល្មើរមកដាំមុខផ្ទះវិញ បន្ទាប់ពីបង្ហោះរួច មានបងប្អូនយើងបានស្នើរសុំអោយខ្ញុំជួយបកស្រាយ។ ដោយថ្ងៃនេះមានចិត្តស្រឡះល្អនិងទំនេរដៃបន្តិច ក៏សូមបកស្រាយបែបសាមញ្ញដូចខាងក្រោម៖ ក្នុងហុងស៊ុយ គេកំណត់ចំណាំថា វត្ថុដែលមានជ្រុងស្រួចអាចនឹងបង្ករអោយមានសាឈី (ឋាមពលអាក្រក់ឬឋាមពលអវិជ្ជមាន)ដែលនាំអោយមានបញ្ហាមកដល់យើងដែលនៅចំមុខជ្រុងស្រួចនោះ មិនថាវាជាជ្រុងផ្ទះ ជ្រុងតុទូ ជ្រុងដំបូលផ្ទះគេចាក់មកផ្ទះយើង ជ្រុងស្លាកយីហោហាង ឬជ្រុងរុក្ខជាតិ(រួមបញ្ចូលទាំងបន្លាស្រួច)នោះទេ គឺមានផលរំខានពីឋាមពលអាក្រក់មកទាំងអស់។ បើយើងគិតតាមបែបសង្គមរស់នៅវិញ ជ្រុងស្រួចងាយនឹងធ្វើអោយយើងមុតរបួស ប៉ះតែបន្តិចគឺមុតឬរងរបួសហើយ មិនថាជ្រុងតុ ជ្រុងជញ្ជាំងទេ ឬបន្លាទេ។ ហេតុនេះហើយទើបគេប្រាប់យើងកុំអោយមានវត្ថុដែលមានជ្រុងស្រួច ឬបន្លានៅមុខឬក្នុងផ្ទះ។ មនុស្សឬសត្វក៏មិនសូវចូលចិត្តកន្លែងមានបន្លាដែរព្រោះវាមិនរមនាដល់ការរស់នៅ។ ការដាំប្រទាលដែលមានបន្លា វានឹងមានផលរំខានពីឋាមពលអាក្រក់បើសិនជាវាមានទំហំធំ ឬដាក់តាំងនៅកន្លែងដែលងាយនឹងប៉ះពាល់ដល់មនុស្ស។ បន្លាតូចៗរបស់ប្រទាលវាមិនបង្ករអោយមានផលរំខានធំដំុទេ បើយើងមិនទៅប៉ះមុតវា ដូច្នេះបងប្អូនដែលនិយមដាំប្រទាលតូចៗដែលមានបន្លាមិនគួរបារម្ភខ្លាំងពេកទេ។ ចំណែកឯដើមល្មើរ ដើមត្នោត ឬដើមឈើផ្សេងៗដែលមានបន្លាអមដើមឬធាង ដរាបណាវាមិននៅទទឹងផ្លូវ ចំមុខទ្វាចូលផ្ទះ បាំងមុខផ្ទះ ទើសទែងការចេញចូល ក៏មិនមានផលរំខានខ្លាំងដែរ។​ បើយើងនៅមន្ទិលថា ដើមល្មើរនាំស៊យ ចូរនាំគ្នាមើលថៅកែរចំការល្មើរ និងតម្លៃផ្លែល្មើរ ចំនុចដែលគួរពិចារណានោះគឺថា បើគេយកលុយមកអោយ ហើយគេគ្រាន់តែឈានជើងមកដល់មាត់ទ្វាផ្ទះស្រាប់តែមុតបន្លាឬទើសមែកឈើស្កេកស្កះ តើគេសប្បាយចិត្តនឹងនាំលាភមកអោយទៀតឬទេ? មុខផ្ទះដូចមុខមាត់របស់មនុស្សយើងដូច្នេះដែរ បើស្រស់ស្អាត មានរបៀប និងមិនបំភ័យគេទេ នោះមនុស្សគ្រប់គ្រានឹងចង់រាប់អាន។ សូមជូនពរអោយបងប្អូនទាំងអស់រួចផុតពីជម្ងឺកូវីដ១៩