ធាតុទឹកក្នុងឆ្នាំ២០២២
បញ្ជាក់៖ មានបងប្អូនជាច្រើនបានគិតថា ធាតុកំណើតជាធាតុសំណាង តែតាមពិតវាមិនដូចគ្នានោះទេ។ អ្នកខ្លះគាត់គិតថា កើតឆ្នាំសត្វអីនោះគាត់មានធាតុនោះជាធាតុសំណាង ហើយអ្នកខ្លះគិតថាគាត់កើតចំថ្ងៃអី នោះគាត់មានធាតុសំណាងជាធាតុរបស់ថ្ងៃនោះជាដើម។ ការកំណត់ហៅអាស្រ័យទៅតាមក្បួនដែលគេប្រើ យើងមិនអាចចោទថាគេខុសនោះទេ។ ក្នុងការប្រើក្បួនប៉ាជឺ គេយក២ចំនុចមកសិក្សាជាចំបង សម្រាប់ព្យាករណ៍ និងលើករាសី នោះគឺ រាសីតួថ្ងៃ និងធាតុសំណាង៖១. រាសីតួថ្ងៃ (ភាសាអង់គ្លេសហៅថា Day Master) គឺជាធាតុដែលតំណាងអោយតួខ្លួនយើង គេអាចដឹងថាជាមនុស្សបែបណាដោយគ្រាន់តែមើលលើធាតុក្នុងប្រអប់រាសីតួថ្ងៃ។២. ធាតុសំណាង ឬធាតុដែលត្រូវការ ជាធាតុដែលរាងកាយយើងត្រូវការ។ ជាទូទៅ គេតម្រូវអោយមានសមតុល្យធាតុទាំង៥ទើបអ្វីៗនឹងរលូនទៅមុខស្រួល តែកម្រមានមនុស្សដែលកើតមកមានសមតុល្យធាតុទាំង៥ណាស់។ ដើម្បីដឹងធាតុសំណាងរបស់យើង ទាមទារអោយមានការវិភាគលើតារាងប៉ាជឺទើបអាចមើលដឹង។ ធាតុទឹកក្នុងឆ្នាំខាល ទឹកយ៉ាង ២០២២ ១. បើធាតុទឹកជារាសីតួថ្ងៃរបស់អ្នក៖ ទឹកនៅឆ្នាំ២០២២ ជាបងប្អូន មិត្តភ័ក្តិ មិត្តរួមការងារ ដៃគូ ឬសាច់ញាតិ អ្នកនឹងមានទំនាក់ទំនងល្អជាមួយពួកគាត់ ហើយអាចអោយពួកគាត់ជួយការងារផ្សេងៗបានគាប់ប្រសើរ។ ២. បើធាតុទឹកជាធាតុសំណាងរបស់អ្នក៖ អ្នកនឹងមានសេចក្តីក្លាហាន ទំនុកចិត្ត និងការជួយទំនុកបំរុងច្រើនពី បងប្អូន មិត្តភ័ក្តិ មិត្តរួមការងារ ដៃគូ ឬសាច់ញាតិ។ ពួកគាត់នឹងជួយអ្នកអោយជោគជ័យលើកកិច្ចការឬជំនួញនានា។ ដោយសារឆ្នាំខាលមានធាតុឈើយ៉ាងជាចំបង ហើយឈើជាធាតុដែលទឹកបង្កើត ដូច្នេះអ្នកនឹងអាចបង្ហាញខ្លួនជាសាធារណៈ បង្ហាញពីសមត្ថភាព និងទេពកោសល្យ ដើម្បីទាញយកលាភបានយ៉ាងល្អប្រសើរ។ នៅក្នុងតួខ្លួនឆ្នាំខាលមានធាតុភ្លើងផងដែរ ហើយភ្លើងជាធាតុលាភរបស់ទឹក នោះអ្នកនឹងមានលាភលើលុយកាក់ និងការវិនិយោគនានា។ ដើម្បីទទួលបានសេវាមើលរាសី សូមទំនាក់ទំនងមកកាន់៖ +85581682258 ។ រួមគ្នាប្រឆាំងការលួចចម្លងសំណេរដើមរក្សាសិទ្ធិគ្រប់យ៉ាងដោយ រៀនហុងស៊ុយ
២០២២ ជាឆ្នាំខាលទឹក+
ការប្រារព្ធពិធីបុណ្យចូលឆ្នាំប្រពៃណីយ៍ចិននឹងធ្វើឡើងនៅថ្ងៃទី៣១ ខែមករា ឆ្នាំ២០២២ តែវេលាដែលគិតរាប់ចូលឆ្នាំថ្មីគណនាតាមរូបមន្តហុងស៊ុយសាកលគឺគេគិតចាប់ពីថ្ងៃទី០៤ ខែកុម្ភៈ តទៅ ដែលចាត់ចូលជាឆ្នាំខាល។ ដូច្នេះទារកដែលកើតចាប់ពីថ្ងៃ០៤ ខែកុម្ភៈ ឆ្នាំ២០២២តទៅ គឺឆ្នាំខាល រហូតដល់ឆ្នាំថ្មី។ ក្នុងឆ្នាំ២០២២នេះ គេអោយឈ្មោះថា ខ្លាទឹកយ៉ាង(+) ដោយសារគេបូករាសីពីប្រភេទបញ្ចូលគ្នា នោះគឺរាសីមេឃ និងរាសីដី ដែលក្នុងនោះរួមមាន៖ ១. រាសីមេឃ៖ ទឹក+ ២. រាសីដី៖ ខាល ឈើ+ (និងតួរាសីខាងក្រោមដែលជារាសីលាក់របស់ឆ្នាំខាលគឺ៖ ឈើ+ ភ្លើង+ និងដី+) តាមការមើលធាតុខាងលើបញ្ចូលគ្នា យើងអាចឃើញថា ឆ្នាំ២០២២ នេះនឹងនាំលាភល្អដល់មនុស្សដែលត្រូវការធាតុទឹក ឈើ ភ្លើង និងដី ដោយឡែកវាមិនអាចជួយអ្នកដែលត្រូវការធាតុមាសបានច្រើននោះទេ។ អត្ថបទក្រោយ យើងនាំចូលទៅកាន់រាសីតាមធាតុរាសីថ្ងៃ និងធាតុសំណាង(ធាតុដែលត្រូវការ)។ តើអ្នកដឹងថាអ្នកមានរាសីថ្ងៃជាធាតុអ្វី និងធាតុសំណាងជាធាតុអ្វីហើយឬនៅ? សូមទាក់ទងមកកាន់រៀនហុងស៊ុយ សម្រាប់ពិភាក្សាលើការមើលរាសី ដើម្បីរកធាតុសំណាងរបស់អ្នក។ រួមគ្នាប្រឆាំងការលួចចម្លងសំណេរដើមរក្សាសិទ្ធិគ្រប់យ៉ាងដោយ រៀនហុងស៊ុយ ជាមួយគ្នា
ថ្ងៃវិសេសក្នុងខែតុលា ឆ្នាំ២០២១
ថ្ងៃដែលមានឋាមពលវិសេសទាំង៥ក្នុង ខែតុលា ឆ្នាំ២០២១ ថ្ងៃទី០៦ ខែតុលា ជាថ្ងៃកុរ-ភ្លើង វាជាថ្ងៃដែលអ្នកអាចក្លាយជាមនុស្សដែលជួយអ្នកដទៃ។ ដូច្នេះអ្នកគួរឆ្លៀតជួយអ្នកដទៃប្រកបដោយភាពជាអ្នកដឹកនាំ និងបង្ហាញនូវអ្វីដែលអ្នកមាន ដើម្បីជួយគេ។ នៅវេលានោះ ចូរអង្គុយបែរខ្នងទៅកាន់ទិសខាងជើង នៅចន្លោះម៉ោង០៧ព្រឹកដល់០៩ព្រឹក។ ថ្ងៃទី១០ ខែតុលា ជាថ្ងៃថោះ-មាស វាជាថ្ងៃដែលល្អប្រសើរបំផុតសំរាប់ការព្យាបាលខ្លួនឯង និងសិក្សាវាយតម្លៃខ្លួនឯង។ ដូច្នេះអ្នកគួរតាំងចិត្តលាងសម្អាតចោលនូវរាល់ឋាមពលមិនល្អទាំងឡាយដែលរារាំងអ្នក ហើយអ្នកអាចធ្វើវានៅចន្លោះម៉ោង០៥ព្រឹកដល់ម៉ៅង០៧ព្រឹក ដោយបែរខ្នងទៅកាន់ទិសត្បូងឆៀងកើត។ ថ្ងៃទី១៥ ខែតុលា ជាថ្ងៃវក-ភ្លើង វាជាថ្ងៃល្អវិសេសសម្រាប់បង្កើតភាពច្នៃប្រឌិតនិងដាស់តឿនសតិអារម្មណ៍។ ចូរបែរខ្នងទៅកាន់ទិសខាងត្បូងដើម្បីភ្ជាប់ទំនាក់ទំនងទៅកាន់ឋាមពលល្អចន្លោះម៉ោង០១រសៀលដល់ម៉ោង៣រសៀល។ ថ្ងៃទី១៨ ខែតុលា ជាថ្ងៃកុរ-ដី វាជាថ្ងៃដែលមានឫទ្ធិសម្រាប់ដោះស្រាយបញ្ហានានា។ អ្នកអាចប្រើវាសម្រាប់ដោះស្រាយបញ្ហាសុខភាព ឬបញ្ហានានាដែលនាំអោយអ្នកមានអារម្មណ៍តានតឹងក្នុងជីវិត។ ចូរអង្គុយបែរខ្នងទៅកាន់ទិសខាងជើង នៅចន្លោះម៉ោង១រសៀលដល់ម៉ោង៣រសៀល។ ថ្ងៃទី២៥ ខែតុលា ជាថ្ងៃមមី-ភ្លើង ជាថ្ងៃល្អសម្រាប់សមាធិទាញសុបិន្តអោយក្លាយជាការពិត។ ចូរទាក់ទងទៅកាន់អាទិទេពប្រចាំជីវិត ឬបើអ្នកមិនស្គាល់ទេ ចូរបែរខ្នងទៅកាន់ទិសខាងត្បូងឆៀងលិច ហើយសរសេរឬនឹកគិតនូវអ្វីដែលអ្នកចង់បាននិងស្រម៉ៃនូវលទ្ធផលទាំងនោះដែលអ្នកនឹងទទួលបាន នៅចន្លោះម៉ោង៣រសៀលនិង៧រសៀល។ អត្ថបទដើមរបស់ ជូអ៊ីយ៉ាប់ប្រែសម្រួលជាភាសាខ្មែរដោយ រៀនហុងស៊ុយ រួមគ្នាប្រឆាំងការលួចចម្លងសំណេរដើមជាភាសាខ្មែររក្សាសិទ្ធិគ្រប់យ៉ាងដោយ រៀនហុងស៊ុយ ជាមួយគ្នា សូមបញ្ជាក់ផងដែរថា រៀនហុងស៊ុយ មិនមានសមត្ថភាពក្នុងការបង្កើតក្បួន ឬរូបមន្តហុងស៊ុយអ្វីឡើយ ព្រោះយើងខ្ញុំគ្មានសញ្ញាបត្រម៉ាស្ទ័រ ឬបណ្ឌិតលើហុងស៊ុយទេ ហើយហុងស៊ុយមានប្រភពដើមមកពីចិន អញ្ចឹងអ្វីដែលយើងប្រើគឺ តៗគ្នា។ អ្វីដែលយើងបានចែកជូនបងប្អូនកន្លងមកទាំងអស់ គឺធ្វើឡើងតាមរយៈការសិក្សាស្រាវជ្រាវពីប្រភពហុងស៊ុយល្អៗនានា បូករួមនឹងបទពិសោធន៍អនុវត្ត ក៏ដូចជាមេរៀនដែលខ្ញុំបានរៀន ហើយប្រែសម្រួលចងក្រងជាភាសាខ្មែរដើម្បីអោយបងប្អូនងាយយល់។ ទាំងនេះជាកិច្ចការដែលយើងខ្ញុំបានខិតខំចំណាយពេលនិងកម្លាំង ដើម្បីរៀបរៀងឡើងជាអត្ថបទភាសាខ្មែរ។ ជាអកុសលមានផេក ឬស្ថាប័នមួយចំនួនបានចម្លងកិច្ចការរបស់យើងខ្ញុំទាំងស្រុងទៅប្រើ ហើយដាក់ថាជាស្នាដៃរបស់ពួកគាត់។ ហេតុនេះហើយទើបកន្លងមកយើងខ្ញុំបានប្រើឃ្លានៅចុងបញ្ចប់អត្ថបទថា៖ រួមគ្នាប្រឆាំងការលួចចម្លងសំណេរដើមរក្សាសិទ្ធិគ្រប់យ៉ាងដោយ រៀនហុងស៊ុយ ជាមួយគ្នា
ព្រះនាងឆាងអឺ
ពិធីបុណ្យសែននំព្រះខែ ជាពិធីបុណ្យមួយដែលប្រជាជនចិន និងអ្នកដែលជាប់សាច់ឈាមចិនតែងប្រារព្ធឡើងជារៀងរាល់ឆ្នាំ នៅថ្ងៃទី១៥ឬ១៦ ខែ៨ ក្នុងប្រតិទិនច័ន្ទគតិរបស់ចិន។ មានការតំណាលតគ្នាជារឿងនិទានជាច្រើនដែលនិយាយអំពីប្រវត្តិរបស់ពិធីបុណ្យសែននំព្រះខែនេះ។ ឥឡូវនេះ ខ្ញុំសូមលើកយករឿងនិទានមួយដែលគេចាត់ទុកថាជាប្រវត្តិរបស់ពិធីបុណ្យសែននំព្រះខែមកចែកជូនជាចំណេះដឹង៖ កាលពី ២១៧០ឆ្នាំមុនគ្រឹស្តសករាជ ដែនចក្រវាឡមានព្រះអាទិត្យចំនួន១០ ដែលបានចែកវេនគ្នាមកបំភ្លឺផែនដី។ វេលាមួយ ព្រះអាទិត្យទាំង១០នោះបានមកព្រមគ្នាដែលបង្ករអោយកើតមានជាគ្រោះក្តៅរាំងស្ងួតលើផែនដី ដែលធ្វើអោយប្រជាជនទាំងអស់នៅលើផែនដីពិបាកទ្រាំរស់។ បន្ទាប់មក មានអ្នកបាញ់ព្រួញម្នាក់ឈ្មោះ ហូអ៊ី បានចេញមុខមកបាញ់ទម្លាក់ព្រះអាទិត្យចំនួន៩អោយធ្លាក់ចុះ។ គាត់បានក្លាយជាវិរៈបុរសសង្គ្រោះផែនដី ហើយក៏ទទួលបានគុជវេទមន្តពីទេវតា (ឯកសារខ្លះនិយាយថាគាត់បានលួចពីទេវតា)។ ដោយសារគុជវេទមន្តនោះប្រើបានសម្រាប់តែម្នាក់ គាត់ក៏អោយប្រពន្ធដែលមានឈ្មោះថា ឆាងអឺ ថែរក្សា។ ថ្ងៃមួយមានចោរបានមកលួចប្លន់គុជវេទមន្តនោះពីឆាងអឺ នាងបានគិតថា បើវាធ្លាក់ក្នុងដៃជនមិនល្អ វានឹងកើតមានកលិយុគលើផែនដីទៀតហើយ។ ដូច្នេះគាត់ក៏សម្រេចចិត្តលេបគុជវេទមន្តនោះ ហើយក៏ក្លាយជាមនុស្សទេពដែលហោះចេញទៅក្លាយជាព្រះច័ន្ទ(ឯកសារខ្លះនិយាយថាគាត់ទៅរស់នៅឋានព្រះច័ន្ទ)។ គាត់មានចិញ្ចឹមទន្សាយមួយហើយទន្យាយនោះក៏ទៅជាមួយគាត់ដែរ។ ហូអ៊ី ខំរត់តាមប្រពន្ធគាត់ តែតាមមិនទាន់ បានត្រឹមបន្សល់នូវភាពសោកសៅ។ ចាប់ពីពេលនោះមក ដល់វេលាថ្ងៃទី១៥ឬ១៦ ខែ៨ ជារៀងរាល់ឆ្នាំ ហូអ៊ី និងប្រជាជនទាំងអស់តែងធ្វើនំព្រះខែសែនថ្វាយនាងឆាងអឺដែលជាព្រះច័ន្ទនោះ ដើម្បីតបស្នងសងគុណតរៀងមក។ មកដល់ពេលបច្ចុប្បន្ន ប្រជាជនដែលមានជាប់ខ្សែស្រឡាយចិនតែងតែប្រារព្ធពិធីសែននំព្រះខែដល់ព្រះនាងឆាងអឺ ហើយក៏រៀបចំជួបជុំក្រុមគ្រួសារដើម្បីកុំអោយព្រាត់ប្រាស់គ្នាដូច ឆាងអឺ និងហូអ៊ី។ អ្នកខ្លះបានថែមទាំងរៀបចំគ្រឿងរណ្តាប់សែន ដើម្បីសុំសេចក្តីសុខ និងបួងសួងផ្សេងៗ (រួមថែមទាំងសុំអោយដល់គូទៀតផង 😀
តើអ្នកដឹងទេ? (វគ្គ៥)
ប៉ាជឺ មិនមែនជា ប៉ាចាយ ខ្ញុំបានសង្កេតឃើញថា មានបងប្អូនយើងមួយចំនួន រួមទាំងផេកបង្រៀនហុងស៊ុយខ្លះផងដែរ មានការភ័ន្តច្រឡំថា ប៉ាជឺ គឺជាវិជ្ជាប្រាណ៨ទិស (ឬដែលខ្ញុំហៅថា វិមានទាំង៨)។ តាមពិតវាជាមុខវិជ្ជា២មុខផ្សេងគ្នាដាច់ស្រឡះ។ ប៉ាជឺ មានអត្ថន័យថា តួអង្គអក្សរទាំង៨ (ឬអ្នកខ្លះហៅថា សសរជីវិតទាំង៤៖ មានម៉ោង ថ្ងៃ ខែ និងឆ្នាំ) ដែលមាននៅក្នុងតារាងប៉ាជឺរបស់យើងហើយវាត្រូវបានគេប្រើសម្រាប់បកស្រាយវាសនារបស់បុគ្គលម្នាក់ៗ តាមរយៈវេលាកំណើតពិតប្រាកដ។ រីឯ វិជ្ជាប្រាណ៨ទិស ភាសាចិនហៅថា ប៉ាចាយ (ឬដែលខ្ញុំហៅថា វិមានទាំង៨) គឺជាវិជ្ជាដែលប្រើសម្រាប់រៀបចំនិងកំណត់រកតំបន់ដែលមានឋាមពលល្អ និងតំបន់ដែលមានឋាមពលមិនល្អនៅក្នុងផ្ទះ។ ប៉ាចាយ ពឹងអាស្រ័យទាំងស្រុងទៅលើទិសដែលផ្ទះបែរមុខទៅរក ហើយដើម្បីអោយកាន់តែមានប្រសិទ្ធិភាពខ្ពស់គេត្រូវយកលេខគ័រជីវិតរបស់អ្នកដែលរស់នៅក្នុងផ្ទះនោះមកគន់គូរបន្ថែម ដើម្បីកំណត់ទីតាំងមង្គលសម្រាប់បុគ្គលនោះ។ សម្រាប់អ្នកដែលបានរៀនវគ្គហុងស៊ុយទូទៅជាមួយខ្ញុំ គាត់ក៏ទទួលបានចំណេះដឹងអំពីមុខវិជ្ជាវិមានទាំង៨នេះផងដែរ។ សង្ឃឹមថា ចាប់ពីពេលនេះតទៅ បងប្អូននឹងលែងយល់ច្រឡំរវាង ប៉ាជឺ និងប៉ាចាយ ទៀតហើយ។ បញ្ជាក់៖ ពាក្យថាផ្ទះដែលបានប្រើខាងលើ គឺសំដៅទៅលើ ភូមិដ្ឋាន ទីក្រុង ការិយាល័យ ឃ្លាំង.. ដែលបញ្ជាក់អំពីអចលនទ្រព្យមួយ។ សូមជូនពរអោយបងប្អូនទាំងអស់មានសុខភាពល្អ និងជោគជ័យគ្រប់ភារកិច្ច! ******** រួមគ្នាប្រឆាំងការចម្លងសំណេរដើមរក្សាសិទ្ធដោយ រៀនហុងស៊ុយ ជាមួយគ្នា #រៀនហុងស៊ុយ#រៀនហុងស៊ុយជាមួយគ្នា#fengshuikhmer#reanfengshui#fengshuikh#ហុងស៊ុយខ្មែរ
កុមារាយ៉ាង
តើអ្នកធ្លាប់លឺគេថាអោយយកក្មេងទៅជាមួយបើអ្នកទៅរកទិញផ្ទះឬដីអីទេ? វាគឺជាជំនឿមួយក្នុងគម្ពីសាសនាតៅ(TAOISM) ដែលបានបញ្ជាក់ថា កុមារមានញាណពិសេសមួយដែលអាចដឹង និងឃើញនូវវិញ្ញាណឬឋាមពលដែលមនុស្សធំមិនដឹងនិងមិនឃើញ ជាពិសេសកុមារា។ ដំណើររឿងនិយាយអំពីក្បួននេះគឺវាវែងឆ្ងាយណាស់ តែបើបងប្អូនកំពុងឬនឹងចេញទៅរកមើលទិញផ្ទះឬដី ខ្ញុំសូមសង្ខេបនូវការប្រើប្រាស់ដូចខាងក្រោម៖ ១. យកកុមារា(ប្រុស)ម្នាក់ដែលមានវ័យក្រោម៧ឆ្នាំទៅជាមួយ ឬកាន់តែប្រសើរបើចេះមើលប៉ាជឺ គួររកកុមារាណាដែលមានតួរាសីថ្ងៃ យ៉ាង (Yang Day Master)(មិនគិតធាតុ) ឧទាហរណ៍៖ ទឹកយ៉ាង ដីយ៉ាង..។២. ចំណាយពេលប្រហែល២០នាទីនៅទីកន្លែងនោះ ហើយសង្កេត៖២.១ បើកុមារានោះលេង ឬធ្វើអ្វីផ្សេងៗដោយចិត្តសប្បាយរីករាយ មានន័យថា កន្លែងនោះមិនមានឋាមពលអាក្រក់ទេ២.២ បើកុមារានោះយំ ឬឈើបត់ជើង ឬស្រេកទឹក មានន័យថា កន្លែងនោះមានឋាមពលអាក្រក់អ្វីមួយហើយ មិនគប្បីទិញយកកន្លែងនោះទេ។ កុមារាដែលមានធាតុយ៉ាងបរិសុទ្ធងាយនឹងទទួលអារម្មណ៍ពាក់ព័ន្ធឋាមពលអាក្រក់ណាស់ ហើយវាក៏ជាមូលហេតុមួយក្នុងចំណោមមូលហេតុជាច្រើនដែលប្រជាជនចិនចង់បានកូនប្រុស។ ទោះយ៉ាងណា គ្រប់យ៉ាងគឺអាស្រ័យទៅលើជំនឿរបស់បងប្អូនផងដែរ! សូមជូនពរអោយបងប្អូនទាំងអស់មានសុខភាពល្អ និងជោគជ័យគ្រប់ភារកិច្ច!********រួមគ្នាប្រឆាំងការចម្លងសំណេរដើមរក្សាសិទ្ធដោយ រៀនហុងស៊ុយ ជាមួយគ្នា#រៀនហុងស៊ុយ#រៀនហុងស៊ុយជាមួយគ្នា#fengshuikhmer#reanfengshui#fengshuikh#ហុងស៊ុយខ្មែរ
រុក្ខជាតិមានបន្លា
កាលពីប៉ុន្មានថ្ងៃមុន ខ្ញុំបានចេញអត្ថបទខ្លីមួយដែលមានខ្លឹមសារថា៖មិនហ៊ានដាំប្រទាលបន្លាតូចៗ ព្រោះខ្លាចខុសហុងស៊ុយ តែបែរជាទៅទិញដើមល្មើរមកដាំមុខផ្ទះវិញ បន្ទាប់ពីបង្ហោះរួច មានបងប្អូនយើងបានស្នើរសុំអោយខ្ញុំជួយបកស្រាយ។ ដោយថ្ងៃនេះមានចិត្តស្រឡះល្អនិងទំនេរដៃបន្តិច ក៏សូមបកស្រាយបែបសាមញ្ញដូចខាងក្រោម៖ ក្នុងហុងស៊ុយ គេកំណត់ចំណាំថា វត្ថុដែលមានជ្រុងស្រួចអាចនឹងបង្ករអោយមានសាឈី (ឋាមពលអាក្រក់ឬឋាមពលអវិជ្ជមាន)ដែលនាំអោយមានបញ្ហាមកដល់យើងដែលនៅចំមុខជ្រុងស្រួចនោះ មិនថាវាជាជ្រុងផ្ទះ ជ្រុងតុទូ ជ្រុងដំបូលផ្ទះគេចាក់មកផ្ទះយើង ជ្រុងស្លាកយីហោហាង ឬជ្រុងរុក្ខជាតិ(រួមបញ្ចូលទាំងបន្លាស្រួច)នោះទេ គឺមានផលរំខានពីឋាមពលអាក្រក់មកទាំងអស់។ បើយើងគិតតាមបែបសង្គមរស់នៅវិញ ជ្រុងស្រួចងាយនឹងធ្វើអោយយើងមុតរបួស ប៉ះតែបន្តិចគឺមុតឬរងរបួសហើយ មិនថាជ្រុងតុ ជ្រុងជញ្ជាំងទេ ឬបន្លាទេ។ ហេតុនេះហើយទើបគេប្រាប់យើងកុំអោយមានវត្ថុដែលមានជ្រុងស្រួច ឬបន្លានៅមុខឬក្នុងផ្ទះ។ មនុស្សឬសត្វក៏មិនសូវចូលចិត្តកន្លែងមានបន្លាដែរព្រោះវាមិនរមនាដល់ការរស់នៅ។ ការដាំប្រទាលដែលមានបន្លា វានឹងមានផលរំខានពីឋាមពលអាក្រក់បើសិនជាវាមានទំហំធំ ឬដាក់តាំងនៅកន្លែងដែលងាយនឹងប៉ះពាល់ដល់មនុស្ស។ បន្លាតូចៗរបស់ប្រទាលវាមិនបង្ករអោយមានផលរំខានធំដំុទេ បើយើងមិនទៅប៉ះមុតវា ដូច្នេះបងប្អូនដែលនិយមដាំប្រទាលតូចៗដែលមានបន្លាមិនគួរបារម្ភខ្លាំងពេកទេ។ ចំណែកឯដើមល្មើរ ដើមត្នោត ឬដើមឈើផ្សេងៗដែលមានបន្លាអមដើមឬធាង ដរាបណាវាមិននៅទទឹងផ្លូវ ចំមុខទ្វាចូលផ្ទះ បាំងមុខផ្ទះ ទើសទែងការចេញចូល ក៏មិនមានផលរំខានខ្លាំងដែរ។ បើយើងនៅមន្ទិលថា ដើមល្មើរនាំស៊យ ចូរនាំគ្នាមើលថៅកែរចំការល្មើរ និងតម្លៃផ្លែល្មើរ ចំនុចដែលគួរពិចារណានោះគឺថា បើគេយកលុយមកអោយ ហើយគេគ្រាន់តែឈានជើងមកដល់មាត់ទ្វាផ្ទះស្រាប់តែមុតបន្លាឬទើសមែកឈើស្កេកស្កះ តើគេសប្បាយចិត្តនឹងនាំលាភមកអោយទៀតឬទេ? មុខផ្ទះដូចមុខមាត់របស់មនុស្សយើងដូច្នេះដែរ បើស្រស់ស្អាត មានរបៀប និងមិនបំភ័យគេទេ នោះមនុស្សគ្រប់គ្រានឹងចង់រាប់អាន។ សូមជូនពរអោយបងប្អូនទាំងអស់រួចផុតពីជម្ងឺកូវីដ១៩
ជំនឿខែខ្មោច (សែនក្បាលទឹក)
ខែ៧ ក្នុងប្រតិទិនច័ន្ទគតិចិន ជាខែដែលប្រជាជនចិននិយមតាមជំនឿហៅថាជា ខែខ្មោច ព្រោះវាជាវេលាដែលគេបើកទ្វានរកអោយវិញ្ញាណក្ខន្ទអ្នកស្លាប់ហើយមិនទាន់បានចាប់កំណើតចេញមកទទួលយកសំណែនដែលសាច់ញាតិនៅរស់សែនអោយ ឬសប្បុរសជនទាំងឡាយដែលមានសទ្ធារសែនអោយខ្មោចអនាថា។ រដូវកាលខែខ្មោចសម្រាប់ឆ្នាំ២០២១នេះ ចាប់ផ្តើមពីថ្ងៃទី៨ ខែសីហា រហូតដល់ ថ្ងៃទី៦ ខែកញ្ញា ឆ្នាំ២០២១។ ដូច្នេះចាប់ពីវេលាចូលថ្ងៃទី៨សីហារហូតទៅ គឺទ្វានរកចាប់ផ្តើមបើកអោយវិញ្ញាណទាំងឡាយចេញមករកសំណែនដែលគេសែនអោយហើយ។ ជាក់ស្តែងថ្ងៃសែនក្បាលទឹកសម្រាប់ឆ្នាំ២០២១នេះ គឺធ្វើឡើងនៅថ្ងៃទី២២ ខែសីហា ហើយវាគឺជាថ្ងៃដែលទ្វានរកបើកធំជាងគេ ដើម្បីអោយវិញ្ញាណខ្មោចទាំងអស់ចេញមកស្ថានមនុស្សលោកដើម្បីទទួលយកសំណែន។ បណ្តាំ៖យើងខ្លាចខ្មោច យើងក៏ត្រូវតែខ្លាចកូវីដជាងខ្មោចទៀត! ក្នុងខែខ្មោចនេះផងដែរ តាមជំនឿរបស់ប្រជាជនចិនគេនិយមមានតំណមមួយចំនួនដូចខាងក្រោមដើម្បីជៀសហេតុភេទអាក្រក់កើតឡើង៖១. បើមិនចាំបាច់ មិនគួរនៅក្រៅផ្ទះចាប់ពីម៉ោង៦ល្ងាចរហូតដល់ម៉ោង៦ព្រឹកឡើយ (ឬក្រោយថ្ងៃលិចរហូតដល់មុនថ្ងៃរះ) ព្រោះជាវេលាខ្មោចចេញដំណើរ២. ហាមប៉ះពាល់ បើកបរកិន ឬដើររំលង សំណែនដែលមាននៅតាមផ្លូវឡើយ ព្រោះអាចប៉ះពាល់ដល់វិញ្ញាណខ្មោចដែលកំពុងស៊ីសំណែន៣. ហាមធ្វើដំណើរផ្លូវឆ្ងាយ៤. ហាមសម្លាប់សត្វល្អិតដែលហើរចូលមកនៅក្នុងផ្ទះ ព្រោះមានជំនឿថាវិញ្ញាណរបស់សាច់ញាតិនឹងកើតជាសត្វល្អិតមកលេង៥. ហាមដោតចង្កឹះបញ្ឈរលើចានម្ហូប ព្រោះអាចធ្វើអោយខ្មោចយល់ច្រឡំថាជាសំណែនហើយខឹងនឹងយើង៦. ហាមលាបក្រចកពណ៌ខ្មៅនិងក្រហម ព្រោះខ្មោចចូលចិត្តពណ៌២នេះ៧. ហាមចូលនៅផ្ទះថ្មី បើកហាងថ្មី ចុះកុងត្រាថ្មី រៀបអាពាហ៍ពិពាហ៍ ទិញរបស់ថ្មី ជួសជុលផ្ទះ.. ព្រោះខ្លាចខ្មោចតាមមកនៅជាមួយ៨. ហាមយំពេលយប់ ព្រោះខ្មោចចូលចិត្តមនុស្សទន់ខ្សោយ៩. ហាមឆ្លើយតបនឹងសម្លេងគេហៅពីក្រោយ១០. ហាមងាកក្រោយបើមានអ្នកណាគោះស្មាពីក្រោយ១១. ហាមស្លន់ស្លោរនិងងាកក្រោយ បើភ្លាមៗមានអារម្មណ៍ថា ត្រជាក់ស្រឹប១២. ហាមនិយាយអំពីខ្មោច ឬបន្លាចគ្នា ឬលេងល្បែងខ្មោច១៣. ហាមព្យួរខោអាវក្រៅផ្ទះពេលយប់១៤. ហាមអង្គុយមើលល្ខោន មើលកុន.. នៅជួរមុខគេបង្អស់១៥. ហាមបើកឆ័ត្រចោលពេលយប់១៦. ហាមហួចពេលយប់១៧. ហាមរើសលុយឬរបស់របរតាមផ្លូវ១៨. ហាមលេងទឹកទន្លេ ឬសមុទ្រ១៩. ហាមធ្វើកម្មវិធីជប់លៀងពេលយប់២០. ហាមព្យួរកណ្តឹងខ្យល់ក្នុងផ្ទះ២១. ហាមថតរូបពេលយប់២២. ហាមនៅមើលទូរទស្សន៍ឬនិយាយទូរស័ព្ទយប់ពេក បើគិតពីជំនឿនិងបំរាម គឺនៅមានច្រើនជាងនេះទៀតតាមតំបន់និមួយៗ។ ជួនកាលខ្មោចវាមិនមកធ្វើអីយើងផ្ទាល់ទេ តែវាដាក់បណ្តាសារអោយអ្នកបំពានអោយកើតរោគនានាផងដែរ ជាពិសេសកូវីដ១៩ដ៏គ្រោះថ្នាក់។ គួរយកវត្ថុស័ក្តិសិទ្ធិតាមខ្លួនជាប់ជានិច្ចបើចាំបាច់ត្រូវចេញក្រៅផ្ទះពេលយប់។ ហើយការប្រយ័ត្ននេះផងដែរក៏គួរធ្វើនៅវេលាកាន់បិណ្ឌមួយរហូតដល់បុណ្យភ្ជុំបិណ្ឌចប់ ព្រោះរដូវកាលខែខ្មោចរបស់វប្បធម៌ចិន ក៏ដូចនឹងរដូវកាលបិណ្ឌខ្មែរយើងដែរ។ គួរមានដើមទទឹមនៅមុខទ្វាផ្ទះដើម្បីកំចាត់ចោលនូវរាល់ធាតុអាក្រក់! បើមានសមាជិកគ្រួសារទើបត្រឡប់មកពីដំណើរឆ្ងាយ ចូរយកស្លឹកទទឹមលាយទឹកអំបិលប្រោះលើបុគ្គលនោះ ឬដើរកន្លងភ្លើងមុនចូលផ្ទះ! ទោះយ៉ាងណា ទាំងនេះជាជំនឿតគ្នា ហើយវាអាស្រ័យទៅលើការជឿរបស់បងប្អូន! សូមប្រកាន់ខ្ជាប់នូវវិធាន ៣កុំ និង៣ការពារ ដើម្បីក្រុមគ្រួសារ និងសង្គមយើងទាំងមូល។ សូមជូនពរនូវសំណាងល្អគ្រប់ពេលវេលា! ********រួមគ្នាប្រឆាំងការចម្លងសំណេរដើមរក្សាសិទ្ធដោយ រៀនហុងស៊ុយ ជាមួយគ្នា #រៀនហុងស៊ុយ#រៀនហុងស៊ុយជាមួយគ្នា#fengshuikhmer#reanfengshui#fengshuikh#ហុងស៊ុយខ្មែរ (រូបភាព៖ អ៊ិនធឹណេត)
តើពេលណាចប់កូវីដ?
មានសំនួរដ៏ពេញនិយមមួយដែលបងប្អូនយើងភាគច្រើនតែងសួរមកខ្ញុំ។ សំនួរ៖ តើពេលណាបានចប់កូវីដ១៩? ចម្លើរបស់ខ្ញុំនោះគឺ៖ បើសួរថាចប់កូវីដពេលណា នោះខ្ញុំគ្មានចម្លើយទេ។ តែបើសួរថា តើមនុស្សអាចគ្រប់គ្រងកូវីដបានពេលណា ខ្ញុំគិតថាប្រហែលជាចូលដល់យុគទី៩ពេញលេញទើបយើងអាចគ្រប់គ្រងវាបានទាំងស្រុង។ នៅពេលនោះទោះបីជាវានៅឆ្លងដល់មនុស្ស ក៏យើងនឹងមិនប្រឈមខ្លាំងដូចពេលនេះដែរ ព្រោះយើងនឹងមានថ្នាំវ៉ាក់សាំងនិងព្យាបាល បានប្រសើរច្រើនជាងពេលនេះ។ បងប្អូនយើងភាគច្រើនសួរតែសំនួរថា ៉តើពេលណាចប់កូវីដ? ៉ តែមិនមានអ្នកណាម្នាក់សួរសំនួរថា ៉តើខ្ញុំអាចធ្វើអ្វីខ្លះក្នុងអំឡុងពេលកូវីដ? ៉ទេ។ កូវីដ១៩ វាមិនមែនត្រឹមតែជាជម្ងឺនោះទេ តែវាជាសញ្ញាដាស់តឿនដល់មនុស្សយើងក្នុងការកែរប្រែរបបនិងទម្លាប់រស់នៅ កែរប្រែការគិត កែរប្រែឥរិយាបទនានាដែលបំផ្លាញដល់ផែនដីនិងមនុស្សជាតិខ្លួនឯង… និងជាសញ្ញាអោយយើងស្វែងរកជំនាញថ្មីៗ ដើម្បីរស់នៅក្នុងសង្គមដែលពោរពេញទៅដោយការប្រកួតប្រជែង។ ឧទាហណ៌៖ ១. មានហាងលក់បាយមួយ បើគាត់មិនផ្លាស់ប្តូរការផ្តល់សេវាដល់អតិថិជនតាមរយៈការដឹកជញ្ជូនម្ហូបអាហារដល់កន្លែងនោះទេ អាជីវកម្មរបស់គាត់ប្រហែលជាប្រឈមមុខនឹងការដួលបះជើងបាត់ទៅហើយ ព្រោះមិនសូវមានអតិថិជនចេញទៅហូបនៅហាងដូចមុនទៀតទេ។ ២. ក្រុមហ៊ុនដែលមានដៃគូអាជីវកម្មនៅឆ្ងាយ បើគេមិនផ្លាស់ប្តូរឥរិយាបទទំនាក់ទំនងដោយប្រើការប្រជុំអនឡាញទេ ក្រុមហ៊ុននោះក៏នឹងប្រហែលដួលបះជើងដែរ ព្រោះការធ្វើដំណើរទៅប្រជុំមិនមែនងាយដូចមុនទៀតឡើយ។ ទាំងនេះគ្រាន់តែជា ឧទាហរណ៍តូចៗសម្រាប់ដាស់តឿនបងប្អូនអោយភ្ញាក់ខ្លួន និងឆ្លៀតរៀនយកជំនាញថ្មីៗបន្ថែមលើជំនាញដែលមានស្រាប់ដើម្បីពង្រឹងការងារអាជីពក៏ដូចជាអាជីវកម្មរបស់ខ្លួន។ ហើយជំនាញថ្មីនោះ គឺជាជំនាញដែលមាននៅក្នុងធាតុភ្លើង។ អ្នកខ្លះប្រហែលជាកំពុងវង្វេងឬរកចាប់ចំនុចចាប់ផ្តើមនៃការឈានចូលចាប់យកជំនាញដែលមាននៅក្នុងធាតុភ្លើងនៅឡើយ ហើយអ្នកខ្លះទៀតក៏បានចាប់ផ្តើមប្រមូលលុយចំណេញពីវារួចទៅហើយដែរ។ សូមប្រកាន់ខ្ជាប់នូវវិធាន ៣កុំ និង៣ការពារ ដើម្បីក្រុមគ្រួសារ និងសង្គមយើងទាំងមូល។ សម្រាប់សេវាប្រឹក្សាពាក់ព័ន្ធនឹងខាងលើ សូមទាក់ទងមកខ្ញុំតាមរយៈប្រអប់សារផេករៀនហុងស៊ុយ ឬតេលេក្រាម៖ +855 8168 2258។ ********រួមគ្នាប្រឆាំងការចម្លងសំណេរដើមរក្សាសិទ្ធដោយ រៀនហុងស៊ុយ ជាមួយគ្នា #រៀនហុងស៊ុយ#រៀនហុងស៊ុយជាមួយគ្នា#fengshuikhmer#reanfengshui#fengshuikh#ហុងស៊ុយខ្មែរ
គ្រែគេង
ថ្មីៗនេះមានបងប្អូនយើងមានសំនួរច្រើនពាក់ព័ន្ធនឹងគ្រែគេង តើគ្រែបែបណាល្អ? តើគ្រែធ្វើអំពីអ្វីល្អជាងគេ? តែគ្រែពណ៌អ្វីល្អជាងគេ? .. គ្រែគេង គឺជាកន្លែងដែលត្រូវរៀបចំអោយល្អ ព្រោះយើងត្រូវចំណាយពេលជាច្រើនជាមួយគ្រែ ហើយគ្រែគឺជាកន្លែងដែលធ្វើអោយយើងសម្រាកកាយនិងសម្រាកចិត្តផងដែរ។ គ្រែដែលល្អជាងគេ គឺប្រភេទគ្រែដែលមិនអឹបជាប់នឹងឥដ្ឋ មានន័យថា គ្រែដែលមានចន្លោះខ្យល់ចេញចូលខាងក្រោមបាន គឺជាគ្រែដែលល្អជាងគេ។ បើគិតតាមក្បួនហុងស៊ុយ គឺយើងត្រូវទុកចន្លោះដើម្បីអោយមានខ្យល់ដែលជាឋាមពលឈីអាចបំលាស់ទីបានទាំងលើនិងក្រោមគ្រែ។ តែបើយើងគិតតាមវេជ្ជសាស្ត្រ គឺយើងត្រូវការបោសសំអាតក្រោមគ្រែអោយបានស្អាត បើមិនដូច្នេះទេ នឹងមានកើតកូនសត្វល្អិតឬធូរលីនៅក្រោមគ្រែដែលអាចនាំអោយមានបញ្ហាសុខភាពបាន។ គ្រែចាំបាច់ត្រូវមានក្បាលគ្រែរឹងមាំ តែក្បាលគ្រែនោះមិនមែនជារូបភាពស្កេកស្កះ រូបភាពស្មុគ្រស្មាញ និងមានជាលក្ខណៈទូតាំងឡើយ។ គ្រែសាងអំពីអ្វី មិនសំខាន់ដូចអ្នកមានលទ្ធភាពទិញគ្រែណាដែលស្រឡាញ់នោះទេ។ គ្រែគួរមានពណ៌រាងស្រអាប់ ឬធាតុយិនអោយបានច្រើន ព្រោះយើងត្រូវការឋាមពលយិនដើម្បីអោយរាងកាយយើងសម្រាកបានស្កប់។ បើអ្នកមានគ្រែប្រអប់រួចទៅហើយ ក៏ប្រើទៅបើមិនមានលទ្ធភាពប្តូរថ្មីទេ តែត្រូវធ្វើអនាម័យជាប្រចាំ! សូមអានមេរៀនបន្ទប់គេង សម្រាប់ចំណេះដឹងបន្ថែម៖ មេរៀនទី ២៣៖ បន្ទប់គេង ********រួមគ្នាប្រឆាំងការចម្លងសំណេរដើមរក្សាសិទ្ធដោយ រៀនហុងស៊ុយ ជាមួយគ្នា#រៀនហុងស៊ុយ#រៀនហុងស៊ុយជាមួយគ្នា#fengshuikhmer#reanfengshui#fengshuikh#ហុងស៊ុយខ្មែរ